Psa 147 | MEU | STEP | Iehova ba imodaia. Badina be eda Dirava ihanamolaina anedia baita abi be namo; badina be ia na mai hariharibadana, bona heimodai anena iabina be namo.

Psalms 147

1 Iehova ba imodaia.
Badina be eda Dirava ihanamolaina anedia baita abi be namo;
badina be ia na mai hariharibadana,
bona heimodai anena iabina be namo.
2 Iehova ese Ierusalem e hadaiamu,
Israel taudia vada e hakarohodia na ia ese e haboudia loumu.
3 Dara doko taudia na taudia e halodiamu,
bona berodia e kumidiamu.
4 Ia ese hisiu na e hagaudiamu,
bona iboudiai na ladadia e henidiamu.
5 Dirava na bada, ena siahu na bada herea,
ena aonega na asi hahetohona.
6 Vada a moidia tao taudia na ia ese e abidia isimu,
a kara dika taudia na ia ese tano ai e tahodia dobimu.

7 Iehova ihanamolaina anedia bavabi;
eda Dirava na gitara anedia amo ba hamoalea.
8 Ia ese guba na ori amo vada e ḡovaia ahu;
medu e heḡaeḡaelaiamu, tanobada ena,
bona rei e hatubuamu ororo ai.
9 Uda ḡaudia na adia e henidiamu;
mukou natudia e taimu negadia ai na ia ese e ubudiamu.
10 Hosi ena goada na se moalelaiamu,
tau aena danu se moalelaiamu;
11 a Iehova ese ia garina e garimu taudia na e moalelaidiamu,
bona ena hebogahisi e laroamu taudia danu.

12 Ierusalem e, Iehova ba imodaia.
Siona e, emu Dirava be imodaia.
13 Badina be ia ese emu ikoukou auridia e ha-aukadiamu,
bona natumu e hanamodiamu maḡumu ai.
14 Maino e havaraiamu emu tano hetoadia ai;
uit namo-hereana amo e hahonumumu.
15 Ena haheḡani e siaiamu, tanobada enai;
ena hereva na e lao haraḡamu.
16 Snow e henimu, beberoho na heto;
medu-hetarina e ḡiḡia rohorohomu, kahu na heto.
17 Ice e tahoa lasimu, aniani momorudia na heheto.
ena keru ai daika baine gini?
18 Ena hereva e siai lasimu, e havevedia ohomu;
ena lai e hatoaiamu, bena ranu e arumu.
19 Ia ese ena hereva na Iakob e gwaurai heniamu;
ena taravatu bona ena hahemaoro herevadia na Israel e heniamu.
20 Bese idauna ta unu se kara henia toma:
idia na ena hahemaoro herevadia asi dibadia.
Iehova ba imodaia.